झाल्टा फाटा येथे उभ्या ट्रकवर कंटेनर आदळून चालक ठार
गणेश ढेंबरे औरंगाबाद
औरंगाबाद : बीडकडे कुरियर घेऊन जाणारा कंटेनर झाल्टा फाटा येथे उभ्या ट्रकवर आदळुन झालेल्या अपघातात कंटेनर चालक गंभीर जखमी झाला. उपचारांदरम्यान घाटी रुग्णालयात त्याचा मृत्यू झाला. फिरोज बुन्‍दू खान असे मृताचे नाव आहे. सरताज मोहम्मद आजाद मोहम्मद वय 24 (रा. हाशमपूर) व त्याचे भावजी फिरोज खान असे दोघे पुण्यातील दादाभाऊ आनंदा झांजड यांच्या कंटेनर यावर चालक आहेत.
गुरुवारी फिरोज खान व सरताज हे दोघेही गुजरातमधील असराली आली येथील कुरियर घेऊन हैदराबाद येथील समशाबादकडे जाण्यासाठी निघाले. बीडकडे जाताना झाल्टा फाट्यावरील हॉटेल समोर मध्यभागी ट्रक उभा होता. यावेळी सरताज यांच्या कंटेनर डाव्या बाजूने उभ्या ट्रकवर आदळला. यात सरताज यांना किरकोळ तर फिरोज खान यांना गंभीर दुखापत झाली. त्यामुळे फिरोज खान यांना सुरुवातीला खाजगी आणि अधिक उपचारासाठी घाटीत दाखल करण्यात आले. सायंकाळी डॉक्टरांनी त्यांना मृत घोषित केले. चिखलठाणा पोलिस ठाण्याचे सहाय्यक पोलीस निरीक्षक विश्वास पाटील यांनी घटनास्थळी पाहणी केली. संताजी यांच्या तक्रारीवरून ट्रक चालकावर गुन्हा दाखल करण्यात आला आहे.
