Amalner: अचानक चक्कर आली आणि तरुण जागेवरच मृत..!
अमळनेर तालुक्यातील मारवड येथील 30 वर्षीय तरुणाचा अकस्मात मृत्यू झाल्याची दुर्दैवी घटना काल दिनांक 7 मे रोजी सायंकाळी घडली आहे. याबाबत गावात शोककळा पसरली आहे.
याबद्दल सविस्तर माहिती अशी की, तालुक्यातील मारवड येथील महारु नामदेव पाटील (वय 30) हा तरुण मिस्तरी काम करून उदरनिर्वाह करीत होता. दिनांक 7 मे रोजी सायंकाळी 7 वाजेच्या सुमारास बाजारपेठेत चक्कर येवून खाली पडला व छाती चोळू लागला. त्यास अधिक त्रास होऊ लागल्याने तात्काळ वाहनाने अमळनेर येथील खाजगी रुग्णालयात हलविले असता डॉक्टरांनी तपासले असता त्यास मृत घोषित केले. त्याचे शवविच्छेदनासाठी ग्रामीण रुग्णालयात दाखल केले असून अक्षय पाटील याच्या फिर्यादीवरून मारवड पोलिसांत अकस्मात मृत्यूची नोंद करण्यात आली आहे. महारू हा कष्टाळू तरुण मिस्तरी काम करून परिवाराचा उदरनिर्वाह चालवत होता. त्याच्या पश्चात पत्नी, दोन मुली, आई, वडील, बहीण असा परिवार आहे.
