Politics Rada: उद्धव ठाकरेंच्या भेटी नंतर अवघ्या अर्ध्या तासात आनंद दिघेंच्या मृत्यू.. शिंदे गटाचा खळबळजनक खुलासा..!
ठाण्यात ठाकरे गटाची महिला पदाधिकारी रोशनी शिंदे यांना सोमवारी (३ मार्च) शिंदे गटाच्या महिलांनी मारहाण केली. यानंतर रोशनी शिंदेंवर रुग्णालयात उपचार सुरू आहे. यावरून मोठ्या प्रमाणात राजकीय पडसाद गदारोळ सुरू आहे. अशातच शिवसेना (शिंदे गट) नेत्या, माजी महापौर मीनाक्षी शिंदे यांनी रोशनी शिंदेंना पोलीस संरक्षण देण्याची मागणी केली आहे. ठाकरे गटावर आरोप करत, राजकारणासाठी रोशनी शिंदेंचा नाहक बळी जाऊ नये, असे मीनाक्षी शिंदेंनी म्हटले आहे.
मीनाक्षी शिंदेंनी दिवंगत आनंद दिघे यांच्या मृत्यूबाबत खळबळजनक दावाही केला आहे. आनंद दिघेंवर रुग्णालयात उपचार सुरू होते. तेव्हा उद्धव ठाकरे रुग्णालयात येऊन गेल्यानंतर अर्ध्या तासात आनंद दिघेंना मृत घोषित करण्यात आले. त्यामुळे आजपर्यंत ठाणेकरांच्या मनात संभ्रमाचे वातावरण आहे. राजकारणाची पातळी घसरत चालली आहे. त्यात रोशनी शिंदेंचा नाहक बळी जाऊ नये असे मीनाक्षी शिंदे म्हणाल्या.
लीलावती रुग्णालयात रोशनी शिंदेंवर उपचार
पंतप्रधान नरेंद्र मोदी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याविरोधात आक्षेपार्ह मजकूर प्रसारित केल्याचा आरोप करत शिंदे गटाच्या महिला कार्यकर्त्यांनी सोमवारी रात्री रोशनी शिंदेंना मारहाण केली. त्यानंतर रोशनी शिंदेंना ठाण्यातील खासगी रुग्णालयात दाखल करण्यात आले होते. त्यानंतर बुधवारी रोशनी शिंदेंना लीलावती रुग्णालयात दाखल केले आहे. रोशनी शिंदेंना काहीही झालेले नाही, असा दावा शिंदे गटाकडून करण्यात येत आहे.
