?नाशिक दुर्घटना : मृतांच्या वारसांना राज्य सरकारकडून 5 लाख रुपयांची मदत जाहीर
नाशिकमध्ये घडलेल्या ऑक्सिजन गळती दुर्घटनेमध्ये तब्बल 22 रुग्णांचा मृत्यू झाला असून राज्य सरकारकडून या मृतांच्या वारसांना 5 लाख रुपयांची मदत देण्याची घोषणा करण्यात आली आहे. याबाबतची माहिती राज्याचे अन्न व नागरी पुरवठा मंत्री आणि नाशिकचे पालकमंत्री छगन भुजबळ यांनी दिली.
बुधवारी दुपारी छगन भुजबळ यांनी घटनास्थळाला भेट दिल्यानंतर त्यांनी प्रसारमाध्यमांशी संवाद साधला. ही अतिशय दु:खद घटना असून कोरोनाविरोधात लढा सुरू असताना अशी दुर्घटना होणे हे अतिशय दुर्दैवी असल्याचे देखील यावेळी भुजबळ म्हणाले. दरम्यान, या प्रकरणाची उच्चस्तरीय चौकशी करण्याचे निर्देश मुख्यमंत्र्यांनी दिल्याचे त्यांनी यावेळी सांगितले.
नाशिक महापालिकेच्या झाकीर हुसेन रुग्णालयात ऑक्सिजन गळतीमुळे झालेल्या दुर्घटनेत काही रुग्णांना आपले प्राण गमवावे लागले.पालकमंत्री छगन भुजबळ यांना या घटनेची माहीती मिळताच तातडीने त्यांनी घटनास्थळी धाव घेतली व या संपुर्ण प्रकरणाची माहिती ते सध्या वरिष्ठ अधिकाऱ्यांकडून घेत आहेत.
