केंद्र सरकारमध्ये खा. डॉ. भागवत कराड होणार केंद्रीय राज्यमंत्री
गणेश ढेंबरे औरंगाबाद
औरंगाबाद : राज्यसभेचे खासदार डॉ. भागवत कराड यांना नरेंद्र मोदी यांच्या मंत्रीमंडळात स्थान मिळाले आहे. त्यांना केंद्रात राज्यमंत्री पद मिळाले असल्याची माहिती भाजप प्रवक्ता शिरीष बोराळकर यांनी दिली आहे.
शेतकरी पुत्र असलेल्या डॉ. कराड यांचा नगरसेवक ते केंद्रात मंत्री असा राजकीय प्रवास झाला आहे. त्यांना मंत्रिपद देऊन भाजपने एकप्रकारे राज्यातील ओबीसींना मोदी सरकारमध्ये प्रतिनिधित्व दिले आहे. डॉ. कराड हे मुळचे लातूर जिल्ह्यातील अहमदपूर तालुक्यातील चिखली गावातील असून, त्यांनी औरंगाबाद येथील शासकीय वैद्यकीय महविद्यालयात वैद्यकीय शिक्षण पूर्ण केले.
शहरात वैद्यकीय व्यवसाय करत असताना 1996 ला त्यांनी भाजपमध्ये प्रवेश केला. त्यानंतर ते नगरसेवक म्हणून निवडून गेले. त्यानंतर त्यांनी औरंगाबाद शहराचे दोनवेळा महापौर, भाजप राज्य कार्यकारणीचे उपाध्यक्ष आणि दोन वर्षे मराठवाडा वैधानिक विकास महामंडळाचे अध्यक्ष या जबाबदाऱ्या सांभाळल्या आहेत. मराठवाड्यात भाजप वाढविण्यात त्यांचा मोठा वाटा आहे.
*डॉ. कराड यांचा राजकीय प्रवास*
भाजपकडून राज्यसभा सदस्य (2020)
भाजपचे सभागृह नेते, औरंगाबाद महानगरपालिका (1999-2009)
औरंगाबाद महानगरपालिकेचे महापौर (एप्रिल 2000 ते ऑक्टोबर 2001 आणि नोव्हेंबर 2006 ते ऑक्टोबर 2007 – 2 वेळा महापौर)
औरंगाबाद महानगरपालिकेचे उपमहापौर (1997-1998)
स्थायी समिती सदस्य, औरंगाबाद महानगरपालिका (1995-1997)
औरंगाबाद महानगरपालिकेत नगरसेवक (1995 ते 2010 या काळात तीन वेळा)
