Breaking: सामान्य माणसाच्या खिशाला चाट..!पेट्रोल डिझेल चे भाव..!
सौदी अरेबियाच्या नेतृत्वातील प्रमुख तेल उत्पादक देशांनी दररोज दहा लाख बॅरलपेक्षा जास्त कच्च्या तेलात कपात जाहीर केल्यानंतर सोमवारी आशियाई बाजारात तेलाच्या किमती जवळपास ६ टक्क्यांनी वाढल्या. ओपेक प्लस देशांच्या या धक्कादायक निर्णयामुळे युरोप आणि आशियामध्ये अमेरिकेच्या तेलाच्या मागणीत पुन्हा एकदा वाढण्याची शक्यता आहे. अशा स्थितीत दिवसेंदिवस वाढत्या महागाईचा सामना करणाऱ्या सर्वसामान्य नागरिकांना पुन्हा एकदा महागाईचा झटका बसणार का? अशी चिंता सतावत आहे.
कच्च्या तेलाचे भाव कडाडले
रविवारी पेट्रोलियम निर्यात करणाऱ्या देशांच्या संघटनेने पुढील महिन्यापासून म्हणजे मे महिन्यापासून उत्पादनात १.१६ दशलक्ष बॅरल प्रतिदिन (बीपीडी) कपात करण्याचा निर्णय घेतला, ज्यामुळे सोमवारी तेलाच्या किमती ६ टक्क्यांहून अधिक वाढल्या आणि यूएस क्रूड ऑइल फ्युचर्स प्रति बॅरल $८० च्या वर पोहोचले. दुसरीकडे आजही कच्च्या तेलाच्या किमतीत तेजीत व्यवहार होत आहे. WTI कच्च्या तेलाची किंमत ०.२९% वाढीस प्रति बॅरल $८०.६५ वर व्यापार करत आहे. तर ब्रेंट क्रूड ऑइल ०.२४ टक्के उसळी घेत ८५.०५ डॉलर प्रति बॅरलवर आहे.
पेट्रोल आणि डिझेलचा आजचा भाव
गेल्या काही दिवसांपासून कच्च्या तेलात तेजी पाहायला मिळत असताना आज भारतातील अनेक शहरांमध्ये पेट्रोल डिझेलच्या दरात बदल झाला आहे. काही शहरांमध्ये वाहन इंधन महाग झाले असून काही ठिकाणी इंधनाचे दर बदलले आहेत. भारतातील पेट्रोल आणि डिझेलचे दर मे २०२२ पासून सलग ११व्या महिन्यात मंगळवारी स्थिर राहिले आहेत. मुंबईत आज पेट्रोल १०६.३१ रुपये प्रति लिटर तर डिझेल ९४.२७ रुपये प्रति लिटर दराने विक्रीसाठी उपलब्ध असताना राष्ट्रीय राजधानी दिल्लीत पेट्रोल आणि डिझेलचे दर अनुक्रमे ९६.७२ रुपये आणि ८९.६२ रुपये प्रति लिटर आहेत.
पेट्रोल आणि डिझेलचे दर कसे ठरवले जातात?
परकीय चलन दर आणि आंतरराष्ट्रीय बेंचमार्क किमतींव्यतिरिक्त इंधनाची किंमत राज्य कर नियम आणि मालवाहतूक शुल्कांवर अवलंबून असते. म्हणून वाहन चालकांना मार्केट भावापेक्षा इंधनासाठी जास्त किंमत मोजावी लागते. दरम्यान, महिन्याच्या पहिल्या दिवशी म्हणजे शनिवार, १ एप्रिल रोजी पेट्रोलियम कंपन्यांनी व्यावसायिक एलपीजी सिलिंडरच्या किंमतीत ९१.५० रुपयांची कपात केली मात्र, घरगुती एलपीजी सिलिंडरची किंमत ‘जैसे थे’ ठेवले.