? जळगांव LIVE… खडसेंचा भाजपला दे धक्का ; भाजपची सत्ता असलेल्या पंचायत समिती उपसभापतीपदी राष्ट्रवादीच्या सुनीता चौधरी
जळगाव : भारतीय जनता पक्षातून राष्ट्रवादीत गेलेल्या एकनाथ खडसे यांनी भाजपला एक मोठा धक्का दिला आहे. भारतीय जनता पक्षाच्या ताब्यात असलेल्या मुक्ताईनगर नगरपंचायतीच्या उपसभापती पदावर राष्ट्रवादी काँग्रेसच्या सुनिता किशोर चौधरी या निवडून आल्या आहेत. एकनाथ खडसेंनी खेळलेल्या खेळीमुळे सुनिता चौधरी यांची पंचायत समितीच्या उपसभापती पदावर बिनविरोध निवड झाली आहे.
मुक्ताईनगर नगरपंचायतीवर भाजपची सत्ता आहे.
पंचायत समितीचा चार वर्षांचा कार्यकाळ आतापर्यंत झाला आहे आणि अद्याप एक वर्षाचा कार्यकाळ शिल्लक आहे. याच दरम्यान भाजपच्या ताब्यात असलेली पंचायत समिती आपल्या ताब्यात मिळवण्यासाठी एकनाथ खडसे यांनी प्रयत्न सुरू केले. त्याचाच एक भाग म्हणून खडसेंनी खेळलेल्या खेळीला यश आल्याचं दिसत आहे.
मुक्ताईनगर नगरपंचायतीच्या उपसभापतीपदावर आज राष्ट्रवादी काँग्रेस पक्षाच्या सुनिता किशोर चौधरी यांची निवड करण्यात आली आहे. पंचायत समितीत एकूण 8 सदस्य आहेत त्यापैकी 6 सदस्य भाजपचे आहेत एक राष्ट्रवादीचा तर एक सदस्य शिवसेनेचा आहे. भाजपचे सर्व सदस्य हे एकनाथ खडसे गटातील असल्याने ते खडसेंच्या उमेदवारालाच मतदान करतील ही भीती भाजपला होती आणि त्यामुळे त्यांनी उमेदवारच दिला नाही आणि ही निवडणूक बिनविरोध झाली.
पंचायत समितीची सत्ताही भाजपाच्या ताब्यात आहे खडसे सध्या राष्ट्रवादीत गेल्यामुळे या ठिकाणी सत्ता काबीज करण्यासाठी खडसेंचे प्रयत्न सुरू आहेत. आज पंचायत समितीच्या उपसभापतिपदी या ठिकाणी राष्ट्रवादीचा उपसभापती बनवला आहे आणि तेही बिनविरोध. एकनाथ खडसे राष्ट्रवादी गेल्यामुळे खडसे अनेक ठिकाणच्या भाजपाच्या सत्ता पलट करण्याचं काम राष्ट्रवादीकडून करीत आहेत.
