सार्वजनिक गणेशोत्सव साध्या पध्दतीने साजरा करा : जिल्हाधिकारी अभिजीत राऊत
रजनीकांत पाटील
जळगाव >> जिल्ह्यातील कोरोना विषाणू संसर्गाची परिस्थिती लक्षात घेता यंदाचा गणेशोत्सव साध्या पध्दतीने साजरा करुन गणेशोत्सव मंडळांनी विधायक कामात प्रशासनास सहकार्य करावे. असे आवाहन जिल्हाधिकारी अभिजीत राऊत यांनी केले आहे.
सार्वजनिक गणेशोत्सव 2020 ची पूर्वतयारी आढावा बैठक जिल्हाधिकारी कार्यालयातील सभागृहात श्री. राऊत यांच्या अध्यक्षतेखाली पार पडली, यावेळी ते बोलत होते.
जिल्हाधिकारी राऊत म्हणाले की, यंदाचा गणेशोत्सव साध्या पध्दतीने साजरा करण्याचा निर्णय राज्य शासनाने घेतला असून याबाबत मार्गदर्शक सुचनाही निर्गमित केल्या आहेत. या मार्गदर्शक सुचनांची माहिती यंत्रणेने सार्वजनिक गणेशोत्सव मंडळांनी करुन द्यावी. त्याचबरोबर या गणेशोत्सवात सार्वजनिक मंडळांनी महापालिका व स्थानिक प्रशासनाची पूर्वपरवानगी घेणे आवश्यक राहील. कोविडचा प्रादुर्भाव रोखण्यासाठी सांस्कृतिक कार्यक्रमांऐवजी आरोग्य विषयक उपक्रमात रक्तदान, प्लाझ्मा दान, विषयक जनजागृती, रुग्णांना मोफत सकस आहार पुरविणे, घरपोच आरोग्य तपासणी करण्यास प्रशासनास मदत व सहकार्य करावे. त्याचबरोबर श्रींच्या आगमन व विसर्जन मिरवणूका काढू नयेत. पूजा व आरती करतांना गर्दी होणार नाही याची दक्षता घ्यावी. सार्वजनिक मंडळाकरीता मुर्ती 4 फुट व घरगुती गणपतीसाठी 2 फुटांच्या मर्यादेत असावी. श्रीगणेशाचे दर्शन सुविधा ऑनलाईन, वेबसाईट, फेसबुक, केबलद्वारे उपलब्ध करुन द्यावी. गणपती मंडपामध्ये निर्जतुकीकरणाची तसेच थर्मल स्क्रीनिंगची व्यवस्था करण्यात यावी. शरिरीक अंतराचे तसेच स्वच्छतेचे नियम पाळणे आवश्यक असल्याचेही त्यांनी सांगितले.
- ऑक्सिजन कॉन्सेंट्रेटर मशीनसाठी सार्वजनिक मंडळांना मदतीचे आवाहन
कोरोना बाधित रुगणांच्या रक्तामधील ऑक्सिजनची पातळी कमी होत असल्यामुळे त्यांना वेळेवर ऑक्सिजन उपलब्ध करुन देणे आवश्यक असते. ग्रामपंचायत स्तरावर किवा प्राथमिक आरोग्य केंदस्तरावर ऑक्सिजनची आवश्यकता भासणाऱ्या रुग्णांकरीता तत्काळ ऑक्सिजन उपलब्ध करुन देण्यासाठी ऑक्सिजन कॉन्सेंट्रेटर मशीन (Oxygen Concencentrator Machine) उपयोगी ठरते. जिल्ह्यातील प्रत्येक गावस्तरावर हे मशीन असावे याकरीता सार्वजनिक गणेशोत्सव मंडळांनी जिल्हा प्रशासनास सहकार्य करण्याचे आवाहन जिल्हादंडाधिकारी श्री. राऊत यांनी जिल्ह्यातील गणेश मंडळांना केले आहे.
- कारखानदारांनी मुर्ती बनविताना शासनाच्या मार्गदर्शक सुचनांचे पालन करावे- डॉ. उगले
शासनाच्या मार्गदशक सुचनांनुसार सार्वजनिक मंडळाकरीता मुर्तीची उंची 4 फुट व घरगुती गणपतीसाठी 2 फुटांची मर्यादा दिलेली असल्याने गणेशमुर्ती बनविणाऱ्या कारखानादारांनी शासनाच्या या सुचनेचे पालन करावे. तसेच गणेशमंडळाना आवश्यक त्या परवानग्यांसाठी पोलीस अधिक्षक कार्यालयात एक खिडकी योजना सुरु करण्यात येणार आहे. मंडळांनी याचा लाभ घेण्याचे आवाहन जिल्हा पोलीस अधिक्षक डॉ. पंजाबराव उगले यांनी यावेळी केले.
- एक गाव, एक गणपती संकल्पना राबवावी – डॉ. पाटील
कोरोना विषाणूच्या पार्श्वभूमीवर गर्दी टाळण्यासाठी जिल्ह्यातील प्रत्येक गावात एक गाव, एक गणपती ही संकल्पना राबवावी. त्याचबरोबर पुजा व आरतीवेळी शासनाच्या मार्गदर्शक सुचना पाळल्या जातील याची दक्षता गणेश मंडळांनी घ्यावी. असे आवाहन जिल्हा परिषदेचे मुख्य कार्यकारी अधिकारी डॉ बी. एन. पाटील यांनी केले.
- गणेश मंडळाना परवानगी आवश्यक – श्री. कुलकर्णी
शासनाच्या नियमांनुसारसार्वजनिक गणेश मंडळांना मर्यादित स्वरुपाचे मंडप उभारण्यासाठी महापालिकेची परवानगी आवश्यक आहे. त्याचबरोबर मंडपाची उभारणी करताना रस्ता, फुटपाथ अथवा कुठल्याही सार्वजनिक मालमत्तेचे नुकसान होणार नाही याची दक्षता मंडळांनी घ्यावी. व त्यानुसार मंडळांनी पूर्व परवानगी घेणे आवश्यक आहे. तसेच मूर्ती विक्रेत्यांसाठी जी. एस. ग्राउंड व सागर पार्क या ठिकाणी व्यवस्था करण्यात येईल अशी माहिती महापालिका आयुक्त सतीश कुलकर्णी यांनी बैठकीत दिली.
बैठकीच्या सुरुवातीस निवासी उपजिल्हाधिकारी राहूल पाटील यांनी सार्वजनिक गणेशोत्सवाबद्दल शासनाच्या मार्गदर्शक सुचनांची माहिती सर्व यंत्रणांना दिली.
