Bollywood Breaking: ही- मॅन ची एक्झीट…
दिग्गज अभिनेते धर्मेंद्र यांचं निधन झालं आहे. वयाच्या ८९ व्या वर्षी धर्मेंद्र यांनी अखेरचा श्वास घेतला आहे. धर्मेंद्र यांच्या निधनाने बॉलिवूडवर शोककळा पसरली आहे. गेल्या काही दिवसांपासून प्रकृती बिघडल्याने धर्मेंद्र यांच्यावर उपचार सुरु होते. धर्मेंद्र यांना व्हेंटिलेटरवर ठेवण्यात आलं होतं. त्यानंतर देओल कुटुंबाने धर्मेंद्र यांच्यावर घरीच उपचार करण्याचा निर्णय घेतला. परंतु आज (२४ नोव्हेंबर) त्यांची प्राणज्योत मालवली. धर्मेंद्र यांच्या निधनाने बॉलिवूडवर शोककळा पसरली आहे.
विले पार्ले येथील स्मशानभूमीत धर्मेंद्र यांच्या पार्थिवावर अंत्यसंस्कार करण्यात आले.यावेळी संपूर्ण देओल कुटुंब आणि धर्मेंद्र यांचे चाहते उपस्थित होते .धर्मेंद्र यांच्या निधनाने सिनेसृष्टी आणि त्यांच्या चाहत्यांना धक्का बसला आहे. धर्मेंद्र पश्चात त्यांची पत्नी हेमा मालिनी. याशिवाय सनी देओल, बॉबी देओल, ईशा, अहाना, विजेता, अजीता ही सहा मुलं आहेत. धर्मेंद्र हे देओल कुटुंबाचे भक्कम आधारस्तंभ होते. त्यामुळे देओल कुटुंब धर्मेंद्र यांच्या निधनाने शोकाकूल झालं आहे.
धर्मेंद्र यांनी गेली सहा दशकं बॉलिवूडवर राज्य केलं. त्यांची भूमिका असलेले ‘शोले’, ‘दादागिरी’, ‘आग ही आग’, ‘जीने नही दुंगा’, ‘धर्म और कानून’, ‘बर्निंग ट्रेन’ या सिनेमांमध्ये वैविध्यपूर्ण भूमिका साकारले. धर्मेंद्र यांच्या तगड्या अॅक्शनमुळे त्यांना बॉलिवूडचे ही-मॅन म्हणून ओळखलं जातं. धर्मेंद्र यांचे अलीकडेच ‘रॉकी और रानी की प्रेम कहानी’ आणि ‘तेरी बातो में ऐसा उलझा जिया’ हे दोन सुपरहिट सिनेमे रिलीज झाले.
मुंबईतील विले पार्ले याठिकाणी असणाऱ्या पवन हंस स्मशानभूमीत धर्मेंद्र यांच्या पार्थिवावर अंत्यसंस्कार करण्यात आले. यावेळी ज्येष्ठ अभिनेते अमिताभ बच्चन लाडक्या मित्राला, ‘जय’च्या ‘विरू’ला अखेरचा निरोप देण्यासाठी पोहोचले होते.
अमिताभ आणि धर्मेंद्र यांनी ‘शोले’सारख कल्ट क्लासिक सिनेमा एकत्र केला. या सिनेमात त्यांच्यावर चित्रित झालेली गाणी, त्यांचे संवाद आणि त्यांची मैत्री आजही आयकॉनिक आहे. याशिवाय त्यांनी ‘नसीब’, ‘चुपके चुपके’, ‘राम बलराम’, ‘हम कौन है’, ‘गुड्डी’, ‘चरणदास’, ‘दोस्त’ अशा गाजलेल्या चित्रपटांमध्ये काम केले आहे. ऑफस्क्रिनही त्यांचा खूप खास बॉन्ड पाहायला मिळाला होता. अशा सिनेमांमधून प्रेक्षकांच्या मनावर अधिराज्य करणारी जय-विरूची ही जोडी तुटल्याने, चाहते हळहळ व्यक्त करत आहेत.
अमिताभ यांच्यासह आमिर खान, संजय दत्त, अभिषेक बच्चन, अक्षय कुमार, अनिल कपूर, सलमान खान असे अनेक कलाकार पोहोचले होते. देओल कुटुंबियांना आधार देण्यासाठी सिनेसृष्टीतील कलाकार एकवटले आणि त्यांनी प्रेक्षकांच्या लाडक्या ही-मॅनला अखेरचा निरोप दिला. याशिवाय अनेक कलाकार आणि चाहत्यांनी सोशल मीडियावर पोस्ट शेअर करत शोक व्यक्त केला आहे.
धर्मेंद्र यांना 2012 मध्ये पद्मभूषण पुरस्काराने सन्मानित करण्यात आले होते. तसेच फिल्मफेअर जीवन गौरव पुरस्कार आणि राष्ट्रीय पुरस्काराने देखील सन्मानित करण्यात आले होते.
धर्मेंद्र यांचा आगामी सिनेमा ‘इक्कीस’ २५ डिसेंबरला रिलीज होणार आहे.श्रीराम राघवन दिग्दर्शित ‘इक्कीस’ सिनेमात धर्मेंद्र झळकणार आहेत. या सिनेमात शहीद मुलाच्या वडिलांची भूमिका ते साकारताना दिसणार आहेत. ‘एका बापाने मुलाला वाढवलं, एका असामान्य व्यक्तिमत्वाने देशाला घडवले’, असं कॅप्शन देत धर्मेंद्र यांचं हे पोस्टर शेअर करण्यात आलं आहे. ‘२१ वर्षांच्या जवानाचे वडील साकारताना धर्मेंद्र जी’, अशा शब्दात धर्मेंद्र यांच्या या भूमिकेची झलक चाहत्यांसमोर शेअर करण्यात आली आहे. मधल्या वाईट काळानंतर धर्मेंद्र यांना नव्या सिनेमातील पोस्टरवर पाहून चाहते भावुक झाले आहेत.
राष्ट्रीय पुरस्कार विजेते आणि ‘बदलापूर’, ‘अंधाधून’ यांसारख्या सिनेमांचे दिग्दर्शक श्रीराम राघवन यांनी या सिनेमाचं दिग्दर्शन केलं आहे. या सिनेमात अगस्त्य नंदा प्रमुख भूमिकेत असून त्याच्यासोबत जयदीप अहलावत, धर्मेंद्र या कलाकारांच्याही प्रमुख भूमिका आहेत. याचवर्षी २५ डिसेंबर २०२५ ला हा सिनेमा प्रेक्षकांच्या भेटीला येणार आहे. धर्मेंद्र यांचा दमदार अभिनय मोठ्या पडद्यावर बघण्यास चाहते खूप उत्सुक आहेत.
