शिवरायांचा एकेरी उल्लेख केल्याने सोनी टीव्हीला नोटीस
सुभाष भोसले-कोल्हापूर
छत्रपती शिवाजी महाराजांचा एकेरी उल्लेख केल्याप्रकरणी सोनी टीव्ही आणि अमिताभ बच्चन यांनी तातडीने माफी मागावी, यासाठी छावाचे योगेश पवार यांनी अॅ्डव्होकेट डी.एन. भंडगे यांचेमार्फत सोनी टीव्ही आणि अमिताभ बच्चन यांना नोटीस पाठविली.
याबाबत सविस्तर हकीकत अशी की., केबीसीमध्ये विचारण्यात आलेल्या एका प्रश्नामध्ये महाराष्ट्राचे आराध्य दैवत छत्रपती शिवाजी महाराज यांचा उल्लेख एकेरी करण्यात आला होता. त्यामुळे महाराष्ट्रातील समस्त मराठा समाज आणि शिवभक्तांच्या तीव्र भावना उमटल्या होत्या. त्यामुळे छावाचे योगेश पवार यांनी धार्मिक भावना दुखावल्या म्हणून अभिनेते अमिताभ बच्चन आणि सोनी टीव्ही यांनी तातडीने जाहीर माफी मागावी, यासाठी नोटीस पाठविली आहे. तसेच सोनी टीव्ही आणि अभिनेता अमिताभ बच्चन यांनी जर तातडीने लेखी माफी मागितली नाहीतर त्यांचेवर धार्मिक भावना दुखवल्याचा फौजदारी गुन्हा नोंदवून यापुढे सोनी टीव्ही व अभिनेता अमिताभ बच्चन यांचे महाराष्ट्रात चित्रीकरणाचे सेट लावू न देण्याचा जाहीर इशारा योगेश पवार यांनी दिलेला आहे.
