Amalner: बस मध्ये चढताना महिलेच्या गळ्यातील मंगळसूत्र चोरट्याने चोरले…
अमळनेर बसस्थानकामध्ये बसमध्ये चढत असताना एका महिलेच्या गळ्यातील सोन्याचे मंगळसूत्र अज्ञात चोरट्याने चोरून नेल्याची घटना बुधवारी १३ नोव्हेंबर रोजी सायंकाळी ५ वाजता घडली आहे. याप्रकरणी गुरुवारी १४ नोव्हेंबर रोजी दुपारी २ वाजता अमळनेर पोलीस ठाण्यात गुन्हा दाखल करण्यात आला.
या बाबत सविस्तर माहिती अशी की दिपाली दिनेश पाटील वय २४, रा. बहादरपूर ता. पारोळा या विवाहित आपल्या परिवारासह वास्तव्याला आहे. कामाच्या निमित्ताने त्या अमळनेर येथे आल्या होत्या. दरम्यान सायंकाळी ५ वाजता त्या बहादरपुर येथे जाण्यासाठी अमळनेर बसस्थानकात बसमध्ये चढत असताना अज्ञात चोरट्याने त्यांच्या गळ्यातील १२ ग्रॅम वजनाचे ९६ हजार रुपये किमतीचे सोन्याचे मंगळसूत्र चोरून नेले. मंगळसूत्र गळ्यात नाही हे लक्षात आल्यानंतर त्यांनी सर्वत्र शोध घेतल्यानंतर त्यांना मंगळसूत्र मिळाले नाही अखेर गुरुवारी १४ नोव्हेंबर रोजी दुपारी २ वाजता अमळनेर पोलीस ठाण्यात तक्रार दिली. त्यानुसार अज्ञात चोरट्यांवर गुन्हा दाखल करण्यात आला. पुढील तपास पोलीस हेड कॉन्स्टेबल प्रमोद पाटील करीत आहे.
