अमळनेर : एसटी संप..नोकरीची धास्ती..संपाची निती आणि बडतर्फची भिती.. चालकाची दुखायला लागली छाती..
अमळनेर आगाराचे प्रविण पाटील यांच्यावर खासगी दवाखान्यात उपचार सुरू
अमळनेर गेल्या ता. 28 ऑक्टोबरपासून सुरु झालेल्या राज्यातील एसटी कर्मचार्‍यांचा संप कर्मचारी संघटना आणि शासनामध्ये तोडगा निघाला नसल्याने अद्यापही सुरुच आहे. परिणामी सर्वसामान्यांची जीवनवाहिनी असलेल्या एसटीची चाके जागेवरच थांबलेली असून, ग्रामीण भागातील विद्यार्थ्यांचे भवितव्य टांगणीला लागल्याचे दिसून येत आहे.
दरम्यान हा संप मोडीत काढण्यासाठी साम, दाम, दंड व भेद या नितीचा अवलंब राज्य सरकारकडून केला जात आहे. एकीकडे नोकरी गमाविण्याची भिती तर दुारीकडे संघटनेचा दबाव यामुळे कर्मचारीवर्ग कात्रीत सापडला असून प्रचंड मानिसक ताणतणावाखाली आहे. अमळनेर आगाराचे वाहक प्रविण पाटील यांची असल्या प्रकारामुळेच घालमेल झाल्याने ते अत्यावस्थ झाले. त्यांना बस आगारातच भोवळ आल्याने तात्काळ उपचारार्थ शहरातील खासगी रूग्णालयात त्यांना दाखल करण्यात आलेले आहे. त्यांची प्रकृती आता साधारण आहे.
प्राप्त माहितीनुसार प्रविण पाटील हे संपावर असल्याने त्यांना निलंबित करण्यात आलेले आहे. त्यांची हेअरिंग सुरूवातीला अमळनेर येथे होत होती. ती आता जळगाव येथेून होत आहे. म्हणजे निलंबित कर्मचार्‍यांना स्वाक्षरीसाठी जळगाव येथे जावे लागते. कॅबिनमध्ये कर्मचार्‍यांना थेट सेवासमाप्तीचीच ऑर्डर हातात टेकवली जाते. यामुुळे गर्भगळीत झालेला कर्मचारी भविष्याची चिंता करतो व घाबरून कामावर येतो म्हणून अर्ज दाखल करतो. जळगावहून अमळनेर आगारात संबंधित कर्मचारी दाखल झाला की त्याला बस फेरी मारण्याबाबत आदेशित केले जाते. पोलीस संरक्षणही दिले जाते. मात्र, तरीही संपकरी सहकार्‍यांचा रोष त्यांना पत्कारावाच लागतो. गद्दार म्हणून अशा पर्याय खुंटलेल्या कर्मचार्‍यवांची निर्भत्सना केली जाते.
अशा परिस्थितीत प्रविण पाटील जळगाव येथे गेले त्यांना संपावर असलेल्या सहकार्‍यांचे बोलणे ऐकावे लागले. अशा दुहेरी दबावात जर बस चालवावी लागत असेल तर कर्मचार्‍याची अवस्था काय होत असेल याचा विचारच न केलेला बरा. या सर्व गोष्टींचा परिपाक प्रविण पाटील यांच्या तब्बेतीवर झाला. ते बसमधून उतरताच कोसळल्याने त्यांना रूग्णालयात दाखल केले.
