येवला तालुक्यातील विकासकामांचा घेतला आढावा व येवला शहरासह तालुक्याच्या शाश्वत विकासाचे नियोजन करावे: पालकमंत्री छगन भुजबळ
शांताराम दुनबळे नाशिक
नाशिक : दिनांक ७ फेब्रुवारी २०२१ येवला शिवसृष्टी प्रकल्प व मुक्तीभूमी येथील कामासाठी तातडीने निविदा प्रक्रिया राबविण्यात यावी; येवला शहरासह तालुक्याच्या शाश्वत विकासाचे नियोजन करावे, अशा सूचना आज राज्याचे अन्न, नागरी पुरवठा व ग्राहक संरक्षण मंत्री तथा जिल्ह्याचे पालकमंत्री छगन भुजबळ यांनी दिल्या आहेत.
पालकमंत्री छगन भुजबळ यांनी येवला तालुक्यातील विकासकामांचा आढावा आज येवला येथिल कार्यालयात घेतला त्यावेळी अधिकाऱ्यांना संबोधित केले. यावेळी अधीक्षक अभियंता शरद राजभोज, येवल्याचे प्रांताधिकारी सोपान कासार, निफाडच्या प्रांताधिकारी डॉ.अर्चना पठारे, येवला तहसिलदार प्रमोद हिले, निफाड तहसिलदार शरद घोरपडे,येवला नगरपालिकेच्या मुख्याधिकारी संगीता नांदूरकर, कार्यकारी अभियंता प्रशांत सोनाग्रा, वैद्यकीय अधीक्षक डॉ. शैलजा कृपास्वामी, तालुका आरोग्य अधिकारी डॉ. एच.आर. गायकवाड, सार्वजनिक बांधमक विभागाचे उपअभियंता उमेश पाटील, महावितरणचे कार्यकरी अभियंता संजय तडवी, दिनेश गवळी, येवला अर्बनचे महेश जगताप, उपविभागीय अभियंता सागर चौधरी, उपअभियंता स.प्र. राजपूत, तालुका कृषी अधिकारी के.ए. नवले, येवला येवल्याचे गटविकास अधिकारी उमेश देशमुख, येवला पोलीस स्टेशनचे पोलीस निरीक्षक संदीप कोळी, लासलगाव पोलीस स्टेशनचे पोलीस निरीक्षक राहुल वाघ यांच्यासह संबंधित अधिकारी उपस्थित होते.
यावेळी पालकमंत्री छगन भुजबळ म्हणाले की, महावितरण बाबत असलेल्या शेतकऱ्यांच्या अडचणी तातडीने सोडविण्यात याव्यात. शेतकऱ्यांना जास्त वेळ वीज उपलब्ध करून द्यावी. कुसुर आणि अंगुलगाव येथील विद्युत उपकेंद्राचे काम तात्काळ पूर्ण करावे. तसेच पुढील आठ ते दहा दिवसांत येवला उपजिल्हा रुग्णालयाचे लोकार्पण करण्यासाठी तयारी करण्याबाबत सूचना आरोग्य व सार्वजनिक बांधकाम विभागाच्या अधिकाऱ्यांना देवून येवला नगरपालिकेच्या प्रलंबित कामांचा अहवाल तातडीने सादर करण्याचे निर्देश मुख्याधिकाऱ्यांना पालकमंत्री श्री. भुजबळ यांनी यावेळी दिले आहेत.
येवला प्रशासकीय संकुलातील देखभाल दुरुस्तीची जबाबदारी सर्व कार्यालयांनी घ्यावी. याठिकाणी कँटीनसह, गार्डन विकसित करण्यात यावे. तसेच कोपरगाव मनमाड रस्त्यावर पथदिव्यांची व्यवस्था करण्यात यावी. शहरात अतिक्रमण होणार नाही याची दक्षता घ्यावी. तसेच येवला येथील शासकीय अधिकाऱ्यांच्या निवासस्थानाबाबतचा प्रस्ताव सादर करण्यात यावा, असेही पालकमंत्री श्री. भुजबळ यांनी सांगितले.
यावेळी येवला व निफाड परिसरातील कायदा व सुव्यस्थेचाही आढावा घेतला.
