नाशिक शहरातील मद्य विक्रीची दुकाने बंद ; आदेशाचे उल्लंघन केल्यास परवाना रद्द
सवलतींचा अतिवापर झाल्यास त्या बंद करणे क्रमप्राप्त – जिल्हाधिकारी श्री सूरज मांढरे
शांताराम दुनबळे
नाशिक दि ५•५•२०२०: सोशल डिस्टन्सिंगच्या नियमांचे पालन करून रेड , ऑरेंज आणि ग्रीन झोनमध्ये मद्य विक्रीस शासनाने परिपत्रकाद्वारे 3 मे 2020 रोजी परवानगी दिली . नाशिक शहर रेड झोनमध्ये असूनही मद्यविक्री दुकाने सुरू करण्यात आली . परंतु बऱ्याच मद्य विक्री दुकानांवर सुरक्षित वावराच्या नियमांना पायदळी तुडवत मोठ्या प्रमाणावर गर्दी झाली . यामुळे कायदा सुव्यवस्थेचा प्रश्न निर्माण होऊन पोलिसांना मनुष्यबळाचा वापर करावा लागला . म्हणून पुढील आदेशापर्यंत नाशिक शहरातील मद्य विक्री दुकाने बंद राहतील . तसेच आदेशाचे उल्लंघन केल्यास संबंधित दुकानांचे परवाना रद्द करण्यात येईल , तसेच सवलतींचा अतिवापर झाल्यास त्या बंद करणे क्रमप्राप्त ठरणार आहे , असे जिल्हाधिकारी सूरज मांढरे यांनी कळविले आहे . याबाबत आज जारी करण्यात आलेल्या आदेशात श्री . मांढरे म्हणतात , शासनाच्या परिपत्रकाचा आधार घेत सोमवारी नाशिक शहरातील सर्व मद्य विक्रीची दुकाने सुरू करण्यात आली . मात्र बहुतांशी दुकानांवर मोठ्या प्रमाणावर गर्दी होऊन हाणामारीदेखील झाली . कायदा व सुव्यवस्थेचा प्रश्न निर्माण झाल्याने पोलिस विभागाला मनुष्यबळाचा वापर करावा लागला . तसेच सदर दुकानांवर कोणत्याही प्रकारचे सामाजिक अंतर , चेहऱ्यावर मास्क घातले जात नसल्याची माहिती या कार्यालयास प्राप्त झाली आहे . ही दुकाने सुरू ठेवल्यास मोठ्या प्रमाणावर विषाणूचा प्रादुर्भाव होण्याची शक्यता नाकारता येत नाही . त्यामुळे नाशिक शहर विभागातील सर्व मद्यविक्री दुकाने बंद राहणार असल्याचे श्री . मांढरे यांनी कळविले आहे . या आदेशाचे उल्लंघन करणाऱ्या व्यक्ती किंवा संस्था यांच्यावर महाराष्ट्र दारूबंदी व आपत्ती व्यवस्थापन कायद्यातील तरतुदीनुसार कारवाईस पात्र असतील . तसेच आदेशाचा भंग झाल्याचे निदर्शनास आल्यास परवाना तात्काळ रद्द करण्यात येणार असल्याचेही श्री . मांढरे यांनी कळविले आहे .
