हिवाळी अधिवेशन Live….मुख्यमंत्र्यांच्या अनुपस्थितीत अधिवेशन सुरू..!ह्या आहेत आजच्या ठळक घडामोडी…!
विधिमंडळाचे हिवाळी अधिवेशन आज बुधवारपासून सुरू झाले आहे. हिवाळी अधिवेशनाचा कालावधी पाच दिवसांचाच असला तरी, यात महाविकास आघाडी विरुद्ध भाजप असा जोरदार व शक्तिशाली सामना बघायला मिळणार आहे.
एकीकडे परीक्षांमधील गोंधळ, एसटी कर्मचाऱ्यांचा लांबलेला संप याबरोबरच ओबीसी आरक्षणावरून विरोधक सत्ताधाऱ्यांना कोंडीत पकडण्याचा प्रयत्न करणार असले तरी सगळ्या हल्ल्यांना तोंड देण्यासाठी आम्ही तयार आहोत, असा सूचक इशाराच उपमुख्यमंत्री अजित पवार यांनी दिला आहे. विधानसभा अध्यक्षपदाची निवडणूक गुप्त मतदानाने होणार नाही, हे स्पष्ट झाल्याने आता या पदावर काँग्रेसचे संग्राम थोपटे किंवा अमिन पटेल यांची निवड होणे ही केवळ औपचारिकताच उरली आहे. याचा केवळ निषेध नोंदवण्यापलीकडे विरोधकांच्या हाती काहीही राहिलेले नाही. तसेच विरोधकांच्या आरोपांना उत्तरे देताना त्यांच्यावरही प्रतिआरोप होतील, अशी अनेक प्रकरणे या अधिवेशनात समोर येण्याची शक्यता असल्याचे अनेक ज्येष्ठ मंत्री सांगत आहेत. त्यामुळे जेवढे विरोधक आक्रमक होतील, तितकेच सत्ताधारीही आक्रमकपणेच त्याचा सामना करण्याच्या तयारीत आहेत. त्यामुळे पुढील पाच दिवस महाराष्ट्रात राजकीय कलगीतुरा रंगलेला पाहायला मिळणार आहे.
- शिवरायांचा अपमान होणं हे दुर्दैवी – एकनाथ शिंदे
- कर्नाटक सरकार मराठी बांधवांवर अन्याय करत आहे – एकनाथ शिंदे
- सभागृहाच्या भावना दुखावल्या असतील तर, मी बिनशर्त माफी मागतो – भास्कर जाधव
- ऊर्जा विभागाची लक्षवेधी सुरू असताना, पंतप्रधान नरेंद्र मोदी यांच्याबद्दल वक्तव्य केल्याने भाजप आमदार आक्रमक, पंतप्रधान नरेंद्र मोदी यांची नक्कल केल्याने भास्कर जाधव यांना निलंबित करण्याची अशी मागणी
- न्यासा कंपनीची निवड का केली यावर राजेश टोपे यांची माहिती
- न्यासा कंपनीला कंत्राट का दिलं; विरोधी पक्षनेते प्रवीण दरेकर यांचा सवाल
- जो कुणी यात दोषी आहेत, त्यांच्यावर कठोर कारवाई होईल- राजेश टोपेंचे उत्तर
- आरोग्य मंत्री राजेश टोपेंकडून गुळगुळीत उत्तर – गोपीचंद पडळकर
- परीक्षेच्या संदर्भातील पुढील योग्य तो निर्णय घेण्यात येईल – राजेश टोपे
- विधान परिषदेचे कामकाज सुरू, परीक्षांच्या मुद्द्यावर आरोग्य मंत्री राजेश टोपे यांचे स्पष्टीकरण
- विधानसभेत गृहमंत्री दिलीप वळसे पाटील यांनी मांडले शक्ती विधेयक
- विधानसभा अध्यक्ष निवड: आवाजी मतदानावर हरकती उद्या, गुरुवारी दुपारी एक वाजेपर्यंत नोंदवता येणार
- विधानसभा अध्यक्षपदासाठी निवड आवाजी मतदानाने होणार
- विधानसभा अध्यक्ष निवडीवरून विरोधकांची घोषणाबाजी; भाजपचा सभात्याग
- मुंबईचे माजी पोलीस आयुक्त परमबीर सिंह यांच्याविरोधात शिस्तभंगाची कारवाई सुरू करण्यात आली आहे, गृहमंत्री दिलीप वळसे पाटील यांनी अधिवेशनात लेखी उत्तरात दिली ही माहिती
- मुंबईचे पोलीस आयुक्त परमबीर सिंग यांना निलंबित करण्याचा प्रस्ताव शासनाने २ डिसेंबर रोजी मंजूर केला आहे
- शेतकऱ्यांच्या खात्यात थेट पैसे गेले पाहिजेत, देवेंद्र फडणवीस यांनी केली मागणी
- बेंगळुरूतील घटनेवर निषेध ठरावासाठी शिवसेनेने केला व्हीप जारी
- l मुख्यमंत्री उद्धव ठाकरे सर्व काम उत्तमरित्या पार पाडताहेत – जयंत पाटील, जलसंपदा मंत्री
- मुख्यमंत्री साहेबांना बरे वाटेल तेव्हा ते उपस्थित राहतील – आदित्य ठाकरे
- मुख्यमंत्री उद्धव ठाकरे अधिवेशनाला उपस्थित राहणार- आदित्य ठाकरे
- विधानभवनाच्या पायऱ्यांवर विरोधकांची जोरदार घोषणाबाजी
- विधानभवनाच्या पायऱ्यांवर विरोधकांची निदर्शने
