Weather Update: अरे हा तर हिवसाळा….या जिल्ह्यांत कोसळणार पाऊस…
राज्यातील हवामान सतत बदलत असून थंडी गायब झाली आहे. किमान तापमानात वाढ झाली असून, दुपारच्या वेळी उन्हाचा चटका जाणवत आहे. अशातच काही ठिकाणी विजांसह हलक्या पावसाची शक्यता हवामान विभागाने वर्तवली आहे.
मुंबई: राज्यात गेल्या काही दिवसांपासून हवामानात सातत्याने बदलत आहे. कडाक्याच्या थंडीनंतर आता पावसाला पोषक हवामान निर्माण झालं असून उत्तरेकडील थंड वाऱ्यांचे प्रवाह कमी झाल्याने थंडी गायब झाली आहे. ढगाळ आकाशामुळे किमान तापमानात वाढ झाली असून, दुपारच्या वेळी उन्हाचा चटका जाणवत आहे.
हवामान विभागाने दिलेल्या माहितीनुसार, राज्यात थंडी कमी राहणार असून आज कोकण व मध्य महाराष्ट्रात तुरळक ठिकाणी विजांसह हलक्या पावसाची शक्यता आहे. सोमवारी धुळे येथील कृषी महाविद्यालयात राज्याचे नीचांकी १२.८ अंश तापमान नोंदवण्यात आलं आहे. राज्यात ६ अंशांपर्यंत आलेले किमान तापमान पुन्हा १२ अंशांहून अधिक झालं आहे. बहुतांश ठिकाणी तापमान १४ अंशांच्या वर गेल्याने थंडी गायब झाल्याचं पाहायला मिळत असून दुपारच्या वेळी उन्हाचा चटका तापदायक ठरत आहे. तसंच उकाडा जाणवू लागला आहे.
या जिल्ह्यात कोसळणार पाऊस
दक्षिण भारतासह, कोकण, मध्य महाराष्ट्राच्या दक्षिणेकडील जिल्ह्यात ढग दाटून आले असून पावसाला पोषक हवामान झालं आहे. राज्यात आज तापमानातील वाढ कायम राहणार असून, राजधानी मुंबईसह ठाणे, रायगड, रत्नागिरी, सिंधुदुर्ग, सांगली आणि कोल्हापूर या जिल्ह्यांमध्ये ढगाळ आकाश, विजांच्या कडकडाटासह हलक्या ते मध्यम पावसाची शक्यता हवामान विभागाकडून वर्तवण्यात आली आहे.
