चाळीसगाव कृषी उत्पन्न बाजार समितीच्या सभापती पदी सरदारशेठ राजपूत तर उपसभापती पदी किशोर भिकनराव पाटील यांची बिनविरोध निवड
येत्या आठवड्याभरात बाजार समितीमध्ये शेतकऱ्यांना 10 रुपयात जेवण देणारी ‘स्व.रामराव जिभाऊ अन्नपूर्णा योजना” व माजी मुख्यमंत्री वसंतरावजी नाईक साहेब यांच्या नावाने कृषी वाचनालय सुरू करणार – आमदार मंगेशदादा चव्हाण
मनोज भोसले
चाळीसगाव – बाजार समितीमध्ये येणारा प्रत्येक शेतकरी आपले दैवत आहे, या दैवताची सेवा करण्याची संधी आपल्याला मिळाली असून सद्यस्थितीत अडचणीत असलेल्या बळीराजाला आधार देणे गरजेचे आहे. पोटाला चिमटा देऊन शेतकरी मोठ्या अपेक्षेने बाजार समितीत येतो. त्यांच्या सोयीसाठी येत्या आठवड्याभरात सहकारमहर्षी स्व.रामराव जिभाऊ पाटील यांच्या नावाने अन्नपूर्णा योजना कार्यान्वित करण्यात येऊन नाममात्र 10 रुपयात शेतकऱ्यांना दर्जेदार असे पोटभर जेवण दिले जाईल तसेच उद्याच हरित क्रांतीचे प्रणेते माजी मुख्यमंत्री वसंतरावजी नाईक साहेब यांच्या नावाने कृषी वाचनालय उद्घाटन करणार असल्याची घोषणा आमदार मंगेशदादा चव्हाण यांनी केली. ते चाळीसगाव कृषी उत्पन्न बाजार समितीच्या सभापती व उपसभापती निवडीच्या प्रसंगी बोलत होते.
चाळीसगाव कृषी उत्पन्न बाजार समितीच्या सभापती व उपसभापती पदाच्या निवडीमध्ये भाजपा – सेना प्रणित सहकार पॅनलचे सरदारशेठ राजपूत यांची सभापती पदी तर उपसभापती पदी किशोर भिकनराव पाटील यांची बिनविरोध निवड करण्यात आली. आमदार मंगेशदादा चव्हाण यांनी सदर निवडी साठी पुढाकार घेतला होता. यावेळी त्यांच्याहस्ते नूतन सभापती – उपसभापती यांचा सत्कार करण्यात आला. पुढील काही महिन्यात कृषी उत्पन्न बाजार समितीचा अमृतमहोत्सव भव्य स्वरूपात साजरा केला जाणार असल्याची माहितीही त्यांनी दिली.
यावेळी भाजपा तालुकाध्यक्ष के बी साळुंखे, बाजार समितीचे माजी सभापती रविंद्र आबा पाटील, माजी उपसभापती महेंद्रबापू पाटील, भाजपा शहराध्यक्ष घृष्णेश्वर पाटील, आरपीआय जिल्हाध्यक्ष आनंद जी खरात, जेष्ठ संचालक मच्छिंद्रभाऊ राठोड, धर्मा बापू काळे, विश्वजित भैय्या खैरनार, शिरीष जगताप, सौ.अलकनंदा धर्मराज भवर, सौ.शोभाबाई आबा पाटील, आर.एल. नाना पाटील, बाळासाहेब वाबळे, तालुका सरचिटणीस प्रा.सुनील निकम, अनिल नागरे, शहर सरचिटणीस प्रशांत पालवे, अमोल नानकर, युवा मोर्चा तालुकाध्यक्ष रोहन सूर्यवंशी, भाजपा तालुका उपाध्यक्ष कपिल पाटील, बंजारा सरपंच संघटनेचे साहेबराव राठोड, डॉ.महेंद्र राठोड, किशोर पाटील ढोमणेकर, प्रज्ञावंत आघाडीचे रमेश सोनवणे, अनुसूचित जमाती आघाडीचे स्वप्निल मोरे, नगरसेवक बापू अहिरे, सौ.विजयाताई प्रकाश पवार, माजी पं.स.सदस्य सतीश पाटे, माजी नगरसेवक अविनाश चौधरी, निलेश महाराज राजपूत, भटके आघाडीचे सुदाम चव्हाण, कार्यालयमंत्री अरुण पाटील, राजेंद्र पगार, कैलास पाटील, ज्ञानेश्वर पाटील, निवृत्ती कवडे, भैय्यासाहेब पाटील, जमादार पाटील यांच्यासह भाजपा – सेना पक्षाचे पदाधिकारी – कार्यकर्ते मोठ्या संखेने उपस्थित होते.
आपल्या मनोगतात आमदार मंगेशदादा चव्हाण पुढे म्हणाले की, शेतकऱ्यांची अर्थवाहिनी असलेली कृषी उत्पन्न बाजार समिती ची धुरा सांभाळण्याचे पुण्याचे काम आपल्या हातून घडणार आहे, सर्व सन्माननीय संचालक मंडळाने समंजसपणे व अतिशय विचारपूर्वक हा निर्णय घेऊन एक आदर्श घालून दिला त्याबद्दल मी त्यांचेदेखील आभार मानतो. चाळीसगाव तालुक्याचे भाग्यविधाते स्व.रामराव जिभाऊ यांच्या कुशल अश्या नेतृत्वाखाली चाळीसगाव कृषी उत्पन्न बाजार समितीची स्थापना झाली. त्यांच्या काळापासूनच जिल्ह्यातील नव्हे तर राज्यातील एक अग्रगण्य बाजार समिती म्हणून चाळीसगाव बाजार समितीची ओळख निर्माण झाली ती यापुढे देखील कायम ठेवण्याची जबाबदारी आपली आहे.
ऑगस्ट २०१५ मध्ये मार्केट कमिटीची निवडणूक होऊन भाजपा – सेना प्रणित सहकार पॅनल ला भरघोस मतांनी विजयी केले. मार्केट कमिटीचे सभापती रविआबा व उपसभापती महेंद्रबापू व सर्व संचालक मंडळाच्या प्रयत्नाने कांदा मार्केट सुरु करण्याचा ऐतिहासिक निर्णय या काळात घेतला गेला. २०१५ मध्ये १२ लाख शिल्लक असलेली बाजार समिती आज 1 कोटी शिल्लक मध्ये आहे. जिल्हाधिकारी यांच्याकडे अडकलेले ७५ लाख रुपये मिळवून देण्यासाठी प्रयत्न करेन.
२०१५ च्या बाजार समिती निवडणूक प्रक्रियेत मी सुद्धा सक्रियपणे सहभागी होतो. माझे वडील रमेश गोविंदा चव्हाण हेदेखील सहकार पॅनलकडून उमेदवार होते. मात्र अल्पश्या फरकाने ते पराभूत जरी झाले असले तरी मला सर्वाधिक आनंद हा आपले पॅनल निवडून येत सत्ता स्थापन झाल्याचा होता. मात्र वडिलांची पुण्याई आणि आपल्या सर्वांचे आशिर्वाद यामुळे आज त्याच पॅनलच्या नूतन सभापती – उपसभापती यांचे अभिनंदन करण्याचे भाग्य मला आमदार या नात्याने मिळाले असल्याचे देखील त्यांनी नमूद केले.
त्यांनतर आमदार मंगेशदादा चव्हाण, नवनियुक्त सभापती व उपसभापती यांनी सहकारमहर्षी स्व.रामराव जिभाऊ पाटील यांच्या बाजार समिती परिसरातील पुतळ्याला माल्यार्पण करून अभिवादन केले.
